كروشيه

 
بسم الله الرحمن الرحيم

شال كروشيه مثلث روعه بغرزة عقدة الحبlove knot stitch

ده شكل الشال



_مقاس الشال: 140 سم عرض و 70سم طول

_المواد المطلوبه: 50جرام من الصوف المهير او اى نوع تفضليه
إبرة كروشيه مقاس 4.5
حوالى 33 خرزة خشب لتجميل الأطراف وممكن الإستغناء عنها

_شرح الباترون بالتفصيل:

*هنشتغل الشال من تحت لفوق زى ما فى الرسم التوضيحى التالى



غرزة عقدة الحبب تتكون من
الشكل A=السلسلة الطويله
الشكل B=العقده

السطر الأول:

1_هنعمل عقدة البداية ثم هنشتغل سلسلة(حرف C فى الباترون)

2_هنسحب اللفه الموجوده على الإبرة حتى يصبح طولها حوالى 2.5 سم ,هنلف الخيط حول الإبرة ونسحبها من خلال اللفه الموجوده على الإبرة,هندخل الإبرة فى الخيط الخلفى لغرزة السلسلة ونلف الخيط حول الإبرة ونسحبها خارج الخيط الخلفى (هنلاحظ وجود لفتين على السنارة) هنلف الخيط حول الإبرة ونسحبها من خلال اللفتين اللى موجودين على الإبرة

الخطوة رقم 2 هيا شرح لغرزة عقدة الحب

هنكرر الخطوة رقم 2 ثلاث مرات(يعنى هنعمل 4 غرز عقدة حب)

3_عشان نعمل اول مربع ونقفل اول سطر هنشتغل غرزة عمود فى سلسلة البدايه

بكدا نكون خلصنا اول سطر المكون من مربع واحد (المربع مكون من 4 غرز عقدة حب)

.............

السطر الثانى:

هنلف العمل ونشتغل 3 غرز عقدة حب ,هنشتغل عمود فى العقدة بتاع ثالث عقدة حب فى اول سطر,هنشتغل 3 غرز عقده حب مرة اخرى,نقفل لسطر بعمل عمود فى العقده بتاع ثانى غرزة عقدة حب فى السطر الاول

وبكدا يبقا السطر الثانى خلص وهوا مكون من مربعين

.............

السطر الثالث:

عشان نلف العمل هنشتغل غرزة عقده حب ثم نعمل غرزة عمود فى العقده بتاع غرزة عقدة الحب رقم 9 كما فى الرسم



بعد مالفينا العمل هنشتغل 3 غرز عقدة حب هنقفلهم بعمود فى العقده رقم8 ,هنشتغل غرزتين عقدة حب ونقفلهم بعمود فى العقدة رقم6 ,هنشتغل 3 غرز عقدة حب ونقفلهم بعمود فى العقدة رقم5

وبكدا نبقا خلصنا ثالث سطر وهوا مكون من 3 مربعات

................

السطر الرابع:

هنلف العمل بشغل عقدة حب وقفلها بشغل عمود فى العقده رقم 18

هنشتغل 3 غرز عقدة حب ونقفلهم بعمود فى العقدة رقم17,هنشتغل غرزتين عقدة حب ونقفلهم بعمود فى العقدة رقم15,هنشتغل غرزتين عقدة حب ونقفلهم بعمود فى العقدة رقم13,هنشتغل 3غرز عقدة حب ونقفلهم بعمود فى العقدة رقم 12

وبكدا نبقا خلصنا السطر الرابع وهوا مكون من 4 مربعات

..............

هنستمر كالسابق ونزود مربع فى كل سطر وعرفنا إزاى بنلف العمل(بعمل عقدة حب وقفلها بعمود فى العقدة بتاع تانى عقدة حب فى اخر مربع من كل سطر سابق)وبنشتغل 3 غرز عقدة حب فى اول واخر السطر بينما بنشتغل غرزتين عقدة حب فى المربعات اللى فى وسط السطر

هنشتغل بالشكل السابق 24 سطر او حتى نصل الى الطول المطلوب ونقطع الخيط

.......
 هنشتغل على جانبى الشال حافة من الكروشيه كالتالى

السطر الأول :

هنشتغل عمود فى الغرزة اللى فى اخر ركن من الشال كما فى الرسم



ثم هنكمل كالتالى(7سلسلة,عمود فى العقدة بين كل غرزتين عقدة حب على طرفى الشال)وهنكرر مابين الأقواس حتى نهاية السطر
ملحوظة:عندما ناتى الى قاع الشال هنشتغل غرزتين سلسلة زيادة عشان يبقا الشغل مريح وياخد دوران الشال من عند القاع

انظرى الرسم التوضيحى التالى



السطر التانى :

هنشتغل غرز منزلقه حتى منتصف اول دائرة من السلاسل
ثم نكمل كالتالى(7 سلاسل,عمود فى منتصف الدائرة)هنكرر مابين الاقواس حتى نهاية السطر

ملاحظة:عند قاع الشال هنشتغل دائرة من السلاسل زيادة عشان يبقا الشغل مريح من عند القاع

السطر الثالث:زى السطر الثانى
السطر الرابع:

هنشتغل (4 سلسلة,هنطول اللفه الموجوده على السنارة حوالى 1_1.5 سم وندخل خرزة فى قلب اللفه دى ثم نضع اللفه على الابره مرة اخرى ونلف الخيط حول الابرة ونسحبها من خلال اللفه اللى موجوده على الابره,4سلسلة,عمود فى منتصف الدائرة,7سلسلة.عمود فى منتصف الدائرة التاليه,7سلسلة,عمود فى منتصف الدائرة التاليه)هنكرر مابين الاقواس حتى نهاية السطر وننهى السطر بدائرة تحتوى على خرزة


............
 بطة مهند



المواد المستخدمة:إستغلى بقايا الصوف المتبقى منك
إستخدمى إبرة كروشيه مقاس 3مللى او3.5 مللى
إستخدمى قطن للحشو

ملاحظة بس فى إختيار الألوان هنشتغل جسم البطة وراسها بنفس اللون وهنشتغل الفستان بلون تانى وهنشتغل الرجلين والعرف والمنقار بلون تالت .


الدرس اللى هنتعلمه من عمل البطة دى هيا إزاى نعمل الكور ,هنشرح إزاى نعمل الكور بمقاسات مختلفة وبعد كدا نشرح البطة بتتعمل إزاى.

لو هنعمل كره كبيرة هنشتغلها كالتالى:
السطر الأول:(3غرزة السلسلة,إعملى لفة بعمل غرزة منزلقة فى أول سلسلة).
السطر التانى:(6غرزة البريد,إشتغلى غرزة منزلقة فى أول غرزة بريد عشان تقفلى السطر,إشتغلى غرزة سلسلة).
السطر التالت:(إشتغلى 2غرزة بريد من كل غرزة بريد فى السطر السابق *يعنى 12غرزة بريد*,إقفلى بغرزة منزلقة فى أول غرزة بريد,إشتغلى غرزة السلسلة.
السطر الرابع:(1غرزة بريد,2غرزة بريد فى غرزة البريد التالية)هنكرر مابين الأقواس هنقفل السطر بعمل غرزة منزلقة فى اول غرزة بريد,هنشتغل غرزة سلسلة=أصبح عندنا فى السطر ده 18 غرزة بريد.
السطر الخامس:(2غرزة بريد,2غرزة بريد فى غرزة البريد التالية)هنكرر مابين الأقواس وهنقفل السطر بعمل غرزة منزلقة فى أول غرزة بريد,هنشتغل غرزة سلسلة=أصبح عدد غرز البريد24 غرزة.
السطر السادس:(3غرزة بريد،2غرزة بريد فى غرزة البريد التالية) هنكرر مابين الأقواس وهنقفل السطر بغرزة منزلقة فى اول غرزة بريد,هنشتغل غرزة سلسلة=عدد غرز البريد بقوا 30غرزة.
السطر السابع:(4غرزة بريد,2غرزة بريد فى غرزة البريد التالية) هنكرر مابين الأقواس هنقفل السطر بغرزة منزلقة فى أول غرزة بريد،هنشتغل غرزة سلسلة=أصبح عدد غرز البريد36غرزة.
السطر الثامن:(5غرزة البريد،2غرزة البريد فى غرزة البريد التالية)هنكرر مابين الأقواس،هنقفل السطر بغرزة منزلقة فى أخر غرزة بريد,هنشتغل غرزة سلسلة=عدد الغرز أصبح 42غرزة.
السطر التاسع:(6غرزة بريد,2غرزة بريد فى غرزة البريد التالية9هنكرر مابين الاقواس،هنقفل بغرزة منزلقة فى أول غرزة بريد,هنشتغل غرزة سلسلة=أصبح عدد الغرز48غرزة.
السطر10 إلى السطر24:هنشتغل غرزة بريد فى كل غرزة بريد وهنقفل بغرزة منزلقة فى أول غرزة بريد ,هنشتغل غرزة سلسلة.
السطر25:(6غرزة بريد,وهنشتغل سابع وتامن غرزة بريد معا)هنقفل بغرزة منزلقة فى أول غرزة بريد ,هنشتغل غرزة سلسلة=اصبح عدد الغرز42غرزة.
السطر27:(4غرزة بريد,هنشتغل خامس وسادس غرزة بريد معا)هنكرر مابين الأقواس,هنقفل بغرزة منزلقة فى أول غرزة بريد.هنشتغل غرزة سلسلة=اصبح عدد الغرز30غرزة.
السطر28:(3غرزة بريد,هنشتغل رابع وخامس غرزة بريد معا)هنكرر مابين الأقواس وهنقفل بغرزة منزلقة فى أول غرزة بريد ,هنشتغل غرزة سلسلة=عدد الغرز أصبح24غرزة.
السطر29:(2غرزة بريد,هنشتغل ثالث ورابع غرزة معا)هنكرر مابين الأقواس هنقفل بغرزة منزلقة فى أول غرزة بريد,هنشتغل غرزة سلسلة=عدد الغرز اصبح18غرزة.
****دلوقتى هنحشى الكورة بالقطن.
السطر30:(1غرزة بريد،هنشتغل تانى وتالت غرزة بريد معا)هنكرر مابين الأقواس وهنقفل بغرزة بريد ,هنشتغل غرزة سلسلة=عدد الغرز أصبح12غرزة.
السطر31:هنشتغل كل غرز البريد معا بمعنى كل اتنين فى غرزة هنقص الخيط ونخيط الفتحة .


لو عاوزين نعمل كره متوسطة:
هنشتغل من السطر الأول إلى السطر 8 زى الكره الكبيرة
بعد كدا هنشتغل من السطر 10 إلى السطر 14
ثم هنشتغل من السطر26 إلى السطر31

لو عاوزين نعمل كره صغيرة:
هنشتغل من السطر الأول إلى6 زى الكره الكبيرة
وبعد كدا هنشتغل من السطر 10إلى السطر 18
ثم هنشتغل من السطر 28 إلى السطر 31

كدا عرفنا إزاى نعمل كورة من الكروشيه بمقاساتها المختلفة


دلوقتى نبتدى فى عمل بطة مهند

جسم البطة:
هنشتغل كورة متوسطة المقاس عندما نصل إلى السطر 13 هنشتغل غرزة بريد من كل غرزة بريد لمدة 8سطور =أصبح عدد الغرز 42 غرزة ثم نترك العمل جانبا

الفستان:
هنشتغل 68 غرزة سلسلة ونقفل السطر بغرزة منزلقة فى أول سلسلة.
هنشتغل غرزة بريد من كل غرزة بريد لمدة أربع سطور
فى السطر التالى هنقص 6غرز بريد بالتساوى

بعد كدا هنشتغل كالتالى(هنشتغل سطر غرزة بريد من كل غرزة بريد ثم السطر التالى هنقص 5 غرز بريد بالتساوى)وهنكرر مابين الأقواس 4مرات
هيصبح عندنا عدد الغرز 42 غرزة بريد.

دلوقتى هنحط جسم البطة داخل الفستان ونشتغل الإتنين مع بعض بعمل غرز بريد من نفس لون الفستان
ثم هنشتغل أخر 6 سطور من الكرة متوسطة الحجم

رأس البطة:
هنشتغل كرة صغيرة الحجم
عندما يصبح عندنا 12 غرزة بريد هنشتغل 7 سطور غرزة بريد عشان نعمل المنقار ,دلوقتى هنحشى الرأس والمنقار بالقطن ,هنقفل المنقار من قدام وهنخيط الراس بالجسم.


الرجلين والعرف:
الإتنين نفس طريقة الشغل بعد مانخلصهم هنخيط إتنين تحت هيبقوا الرجلين ونخيط واحد فوق الرأس وده هيبقا العرف.
هنشتغله كالتالى/
السطر الأول:6 غرزة بريد,هنلف ونترك غرزة سلسلة ونشتغل 4 غرزة بريد,2غرزة سلسلة,نلف.
السطر 2:2غرزة بريد من كل غرزة بريد,2غرزة سلسلة,نلف.
السطر3:إشغلى سطر من غرزة البريد,2غرزة السلسة,نلف.
السطر4:1غرزة بريد,4سلسلة,3غرزة بريد ثلاثية فى أول سلسلة,هنترك غرزة بريد,ونشتغل غرزة بريد فى غرزة البريد التالية,4سلسلة,3غرزة بريد ثلاثية فى أول غرزة سلسلة,هنترك 2غرزة بريد,غرزة بريد فى غرزة البريد التالية,3غرزة بريد ثلاثية فى أول سلسلة,هنترك غرزة بريد،هنشتغل غرزة بريد فى أخر غرزة بريد.


العينين:
هنشتغل كالتالى/
السطر الأول:3 غرزة السلسلة,وهنقفل بغرزة منزلقة فى أول سلسلة.
السطر2:هنشتغل 6غرز بريد على مدار السطر ,هنقفل بغرزة منزلقة فى أول غرزة بريد,1غرزة سلسلة.
السطر 3:هنشتغل غرزة بريد من كل غرزة بريد وهنقفل بغرزة منزلقة فى اول غرزة بريد.


فى النهاية هنزوق طرف الفستان بحافة من الكروشية كالتالى/
غرزة بريد(3سلسلة,غرزة بريد ثلاثية فى أول سلسلة,هنترك 1سم تقريبا,غرزة بريد فى الغرزة التالية)وهنكرر مابين الأقواس وهنقفل السطر بغرزة منزلقة فى أول غرزة بريد فى السطر.


وبكدا يبقا خلصنا بطة مهند وألف مبروك عليكوا

برجاء عند نقل الموضوع ذكر المصدر منتديات لهلوبة